فهاد الوقت افضل طريقة باش تجنب المشاكل مع الشركات الكبرى هي انك تفكر فالبراندين، حيت كتخليهم يتيقو فيك، وأي مشكل عندك كيحلوه بسرعة ...
هاد الموضوع ديال البراندين شوية فلسفي ومعقد وفيه بزاف ديال المحاور، داكشي باش فهاد الموضوع انحاول نهضر بالمختصر المفيد على كيفاش ممكن دير براند ديالك في المغرب...
طبعا مغنتطرقش لاينا منتج تخدم عليه، حيت هادي مسألة متعلقة بكل واحد وبالدراسة للمشروع لي غايدير، ولكن براند كتخدم ديما على منتجات لي evergreen يعني شي حاجة لي ديما خداما وديما كاين كليان ديالها، وبالتالي الاختيار ديالك خاصو وقت ودراسة معمقة للطلب، للعرض، للمنافسة، وللإمكانيات ديالك (المادية والمعنوية)...
الى كنتي باغي تستورد المنتج ديالك من برا، فراه كاين شركات لي كيديرو ال private labeling يعني كيحطو اللوغو ديالك في المنتج، وال packaging وما الى دلك، بمعنى اخر كيوصل المنتج ديالك ناضي كندي ... وبالنسبة للجمارك فطبعا انت مطالب بأنك دير شركة ديالك، وتسجل العلامة التجارية ديالك في ompic، باش تحمي راسك، وتسجل في هيئة الجمارك، وتشوف شي transitaire لي يخرج ليك السلعة ديالك، فهادشي كوولو كاين مصااريف والاهم هو ضرب حسابك قبل ما تجيب السلعة باش مايصدقش المنتج طايح غالي ...
اما الى كنتي اتخدم بمنتجات من المغرب، يكفي انك تشوف شي designer يصايب ليك ال visual identity ديال المشروع ديالك، وكدلك ال packaging وما الى دلك، وطبعا دير شركة وتسجل في ال ompic، وهانتا واجد للخدمة.
صراحة هادشي لي فات غير الخوشبيش، حيت الاهم في البراندين هي العلاقة لي كتكون بين البراند وبين الكليان، وكدلك داك الاحساس الابستيمولوجي لي كيحس بيه الكليان ملي كيتفكر البراند ديالك ولا ملي كيكونصومي المنتج، داكشي باش قلت ان هاد المفهوم يكتسي طابع فلسفي معقد على حسب باروخ سبينوزا.
البراند ديالك خاصها تقدم واحد القيمة مضافة للكليان ديالك، خاصها تكون كتعني ليه شي حاجة مهمة، وتخليه يحس باحساس زوين، نهار كتمشي تقهوا مثلا ف Starbucks، كتحس براسك كوول، لدرجة انك كتصور راسك تما وتحطها في انستاجرام باش تبان انك مريح فيها، مع العلم انها مجرد محل فيه كراسة، لكن في المضمون القضية اعقد من دلك، كاين لي غايقولك ها اتصالات المغرب مثلا ماحاملها تا واحد وهوما طوپ، اه ولكن هادشي لي قلت مكاينطابقش على شركة monopoleur فالسوق، مكاينش البديل.
الشركات كيعطيو اهمية كبرى لل CRM ولي كنقصد بيه تدبير العلاقات مع الكليان، هاد الكلام راه ولا département قائم بداتو فشركة، حيت هو والتسويق هما لي كيتعتابرو الاهم في البراندين، داكشي باش خاصك ضروووري تعمر راسك مزيان في هاد المجال، وتفهم كيفاش ممكن تحسن العلاقات ديالك مع الكليان، سواء لي كاينين ولا لي جايين.
كيما قلت الخدمة كلها في البراندين متوقفة على التسويق (وماشي اي تسويق، بل التسويق الخاص بالبراندين) وكدلك ال CRM هاد الجوج ديال مسائل هما العامل الرئيسي لي خلاوك نتا كمستهلك لمنتجات/خدمات واحد الماركة، مستعد دافع عليها فأي لحظة قدام شي شخص كيعاير فيهم، هادشي كولو وصلتي ليه بفضل التسويق وال CRM ديالهم.
البراندين سواء في المغرب او على برة كيخصو رأس مال مهم، واستراتيجية محكمة، وناس عارفين شنو كايديرو، ولكن كيبقا افضل من اي بزنس مودل اخر، حيت كيولي كلشي عندك مبني على الثقة، وكتكون عندك معرفة قوية سواء بالخدمة والمنتج ديالك وكدلك الكليان ديالك رغباتهم وتطلعاتهم، ماشي بحال الدروبشيبينغ ولا الكاش اون دلڤري كتلقا الناس فيهم خدامين على منتجات مختلفة في كل مرة، فعلا هو بزنس مودل وفيه فلوس، ولكن كضيع فيه وقت وجهد وفلوس اكثر من انك دير براند ديالك...
Make em need it, then buy it.
منقول Yassine Aakam
لدعم فريق الموقع، شارك على
ليست هناك تعليقات:
إرسال تعليق